الدرس الثالث : صور النيتروجين

 

الدرس الثالث : النيتروجين مش شكل واحد

في الدرس اللي فات عرفنا إن النيتروجين مهم جدا للنبات .

لكن دلوقتي في سؤال مهم :

هو النيتروجين كله واحد ؟

الإجابة :

لا .

النيتروجين موجود في صور ومصادر مختلفة .

وعلشان كده لما حد يقول :

" أنا عايز سماد نيتروجيني ."

السؤال الصح مش :

" أجيب له إيه ؟"

السؤال الأول :

" النبات محتاج إيه ؟ وظروف الأرض والري عاملة إزاي ؟"

 

أشهر صور النيتروجين

بشكل مبسط , هنقابل صور مهمة زي :

النترات No3-

ودي صورة يستطيع النبات امتصاصها مباشرة من محلول التربة .

الأمونيوم +NH4

ودي برضه صورة يستطيع النبات الاستفادة منها , لكنها بتتصرف بشكل مختلف في التربة مقارنة بالنترات .

اليوريا

وهنا لازم نفهم حاجة :

اليوريا نفسها مش هي الصورة النهائية اللي النبات بياخدها مباشرة بالشكل اللي بنحطه في السماد .

بعد إضافتها للتربة , بتدخل في تحولات ميكروبية وكيميائية , وبتتحول في النهاية إلي صور يستطيع النبات الاستفادة منها .

وعلشان كده طريقة استخدامها والظروف المحيطه بها مهمة جدا .

 

طيب ليه الكلام ده يهمني كمزارع أو مهندس ؟

لأنك ممكن تستخدم مصدر نيتروجين ممتاز ...

لكن لو استخدمته بطريقة غلط أو في توقيت غير مناسب , النتيجة مش هتبقي زي ما انت متوقع .

مثلا :

مصدر النيتروجين + طريقة الإضافة + كمية المياة + نوع التربة + مرحلة نمو النبات

كلهم مرتبطين ببعض .

يعني مش كل برنامج تسميد ينفع يتنقل من أرض لأرض بنفس الشكل .

خلينا ناخد اليوريا كمثال

اليوريا من أشهر الاسمدة النيتروجينية المستخدمة في الزراعة .

لكن لما تتحط علي سطح التربة وتتعرض لظروف معينة , ممكن يحصل فقد للنيتروجين في صورة غاز الأمونيا .

وده أحد الأسباب اللي بتخلينا نهتم بطريقة وضع السماد والتعامل معاه .

يعني لما نقول للمزارع :

" حط اليوريا ."

مش كفاية .

لازم نفكر :

هتحطها ازاي ؟

إمتي ؟

علي إي أرض ؟

وهتتروي إمتي ؟

لأن طريقة الاستخدام ممكن تفرق في كفاءة الاستفادة من السماد .

 

والنترات ؟

النترات متحركة في التربة بشكل أكبر من الأمونيوم .

وده معناه إن إدارة الري مهمة جدا .

لأن زيادة المياه ممكن تساعد علي انتقال النترات لاسفل بعيدا عن منطقة الجذور , خصوصا في الأراضي الخفيفة .

فلو أنت بتسمد كويس , لكن بتروي بطريقة غير مناسبة ...

ممكن جزء من اللي دفعته في السماد ما يستفيدش منه النبات بالشكل المطلوب .

وهنا نفهم قاعدة مهمة

التسميد والري أصحاب .

مينفعش تفكر في واحد وتنسى التاني .

لان النبات في النهاية بياخد العناصر الغذائية من محلول التربة , والمياه جزء أساسي من الموضوع .

 

هل معنى كده غننا نختار النترات دائما ؟

برضه لأ .

مفيش قاعدة تقول :

" النترات أحسن دائما ."

ولا :

" اليوريا أحسن دائما ."

ولا :

" الأمونيوم أحسن دائما ."

الاختيار بيتحدد حسب :

-         المحصول

-         مرحلة النمو

-         نوع التربة

-         طريقة الري

-         حالة النبات

-         الظروف الجوية

-         نظام التسميد

-         والهدف من الإضافة .

وده بالضبط اللي عايزين نتعلمه في أكاديمية كتراج .

نفهم الظروف الاول , وبعدها نختار .

 

مثال بسيط

عندك مزرعتين :

مزرعة أرضها خفيفة والري فيها بالتنقيط .

ومزرعة تانية أرضها مختلفة وطريقة الري مختلفة .

هل ينفع تاخد نفس برنامج النيتروجين بالحرف وتحطه في الاتنين ؟

مش بالضرورة .

لأن حركة العنصر في التربة واستفادة النبات منه ممكن تختلف .

وعشان كدة :

البرنامج الزراعي مش وصفة محفوظة .

 

مهندس كتراج يعمل إيه ؟

المهندس الشاطر لما يسمع :

" أنا عايز نيتروجين ."

ما يردش باسم منتج علي طول .

يسأل :

المحصول إيه ؟

العمر أو مرحلة النمو إيه ؟

نوع الأرض إيه ؟

الري إزاي ؟

آخر إضافة كانت امتى ؟

النبات حالته إيه ؟

وبعدها يبدأ يحدد المصدر والجرعة والتوقيت وطريقة الإضافة وفقا للحالة .

 

الخلاصة

1-   النيتروجين مش صورة واحدة .

2-   النترات والأمونيوم واليوريا مش نفس الشئ في سلوكهم .

3-   طريقة استخدام مصدر النيتروجين مهمة جدا .

4-   الري ونوع التربة بيأثرو علي حركة النيتروجين واستفادة النبات منه .

5-   مفيش مصدر واحد هو الافضل لكل المحاصيل وكل الأراضي .

وأهم جملة في الدرس :

مش المهم أدي النبات نيتروجين ...المهم أخليه يستفيد من النيتروجين .

في الدرس القادم هنسيب النيتروجين شوية ونروح للعنصر اللي دايما بييجي بعده في كلام المزارعين :

الفوسفور P

ليه النبات محتاجه ؟ وإيه علاقته بالجذور والطاقة والتزهير ؟

أكاديمية كتراج ... نفهم الأول , وبعدين نوصي .