الدرس السابع : البوتاسيوم
البوتاسيوم – عنصر التوازن والجودة
لو سألت مزارع :
" البوتاسيوم بيعمل إيه ؟"
ممكن يقولك :
" بيكبر الثمرة ."
والإجابة دي فيها جزء من الحقيقة ...
لكن البوتاسيوم اكبر من كدة بكتير .
طيب البوتاسيوم بيعمل إيه ؟
البوتاسيوم عنصر أساسي للنبات , وله أدوار كثيرة جدا .
ومن أهم أدواره إنه بيساعد النبات في :
- تنظيم حركة المياه .
- تنظيم فتح وغلق الثغور .
- تنشيط إنزيمات وعمليات حيوية كتيرة .
- نقل بعض المركبات داخل النبات .
- تحسين كفاءة استخدام المياه .
- دعم جودة المحصول في كثير من الحالات .
- يعني ببساطة :
البوتاسيوم بيساعد النبات ينظم شغله .
يعني إيه ينظم المياه ؟
النبات مش بيشرب مياه وخلاص .
المياه لازم تدخل وتتحرك داخل النبات , والنبات لازم يتحكم في فقد المياه من الأوراق .
وهنا البوتاسيوم له دور مهم في تنظيم فتح وغلق الثغور الموجودة في الأوراق .
والثغور دي ممكن تتخيلها زي :
أبواب صغيرة جدا في الورقة .
من خلالها بيحصل تبادل للغازات , وكمان النبات بيفقد جزء من المياه عن طريق النتح .
والبوتاسيوم بيساعد النبات في تنظيم عملية فتح وغلق هذه الثغور .
طيب علاقته بجودة الثمار ؟
هنا نرجع للجملة اللي بنسمعها :
" البوتاسيوم للثمار ."
البوتاسيوم له علاقة بعمليات كثيرة تؤثر في جودة وإنتاج المحصول , ومنها نقل وتوزيع السكريات والمركبات داخل النبات .
وعشان كدة التغذية الجيدة بالبوتاسيوم ممكن تكون مهمة جدا في محاصيل كتيرة أثناء مراحل تكوين وتطور المحصول .
لكن ...
مش معني كده إننا أول ما نشوف ثمرة نحط بوتاسيوم .
لأن احتياج النبات بيتغير حسب :
- المحصول
- الصنف
- مرحلة النمو
- الحمل
- حالة النبات
- التربة
- الري
- وباقي العناصر
طب لو النبات ناقص بوتاسيوم ؟
نقص البوتاسيوم ممكن يظهر بأعراض مختلفة حسب المحصول وشدة النقص .
ومن العلامات الشائعة :
اصفرار أو احتراق حواف الأوراق , خصوصا الأوراق الأكبر سنا في كثير من الحالات .
وممكن يظهر :
- ضعف في النمو
- ضعف في جودة المحصول
- زيادة حساسية النبات لبعض الظروف المجهدة .
لكن زي ما اتفقنا :
ما تشخصش من صورة واحدة .
لأن احتراق حواف الورقة ممكن يحصل لأسباب مختلفة .
طيب زيادة البوتاسيوم ؟
نفس القاعدة :
الزيادة مش دايما أحسن .
زيادة البوتاسيوم عن احتياج النبات ممكن تؤثر علي توازن وامتصاص بعض العناصر الصغرى الأخرى .
يعني ممكن تكون بتحاول تحسن تغذية النبات ...
فتعمل اختلال في التغذية .
وده يخلينا نرجع للجملة الأساسية :
النبات محتاج توازن , مش مجرد كميات كبيرة .
البوتاسيوم والري
ودي نقطة مهمه جدا .
إحنا قلنا ان البوتاسيوم له علاقة بتنظيم المياه داخل النبات .
لكن كمان إدارة الري نفسها مهمة جدا في استفادة النبات من العناصر .
يعني لو عندك نبات :
ريه غلط + جذور تعبانة
مش معنى إنك تزود بوتاسيوم إن المشكلة هتتحل , لأن الجذر هو نقطة البداية في امتصاص المياه والعناصر .
مثال من أرض المزارع
مزارع عنده محصول مثمر وبيقول :
" الثمار مش بالجودة اللي أنا عايزها , هاتلي بوتاسيوم ."
هل نوافق علي طول ؟
لا .
نسأله :
المحصول إيه ؟
في أي مرحلة ؟
الحمل عامل ازاي ؟
الري منتظم ؟
الجذور حالتها إيه ؟
برنامج التسميد ماشي إزاي ؟
هل فيه تحليل تربة أو نبات ؟
هل في أعراض نقص فعلية ؟
لان جودة المحصول مش مسؤولية البوتاسيوم لوحده .
ال NPK مش 3 أبطال منفصلين
وده مهم جدا .
إحنا اتكلمنا عن :
النيتروجين – N
الفوسفور – p
البوتاسيوم – k
لكن النبات مش بيختار واحد منهم ويقول :
" النهارده عايز بوتاسيوم ومش عايز الباقي ."
النبات محتاج العناصر في توازن مناسب .
والاحتياج بيتغير مع :
المحصول + المرحلة + التربة + الظروف .
خلينا نراجع بسرعة
النيتروجين :
مرتبط بشكل كبير بالنمو الخضري وبناء مركبات أساسية في النبات .
الفوسفور :
مهم في الطاقة ونمو الجذور وعمليات حيوية وتكاثرية متعددة .
البوتاسيوم :
مهم في تنظيم المياه والعمليات الحيوية ونقل المركبات ودعم جودة المحصول .
لكن الثلاثة : بيشتغلو مع بعض .
والسؤال : لو مزارع قالك :
" أنا داخل علي تحجيم الثمار , يبقى أوقف النيتروجين وأدي بوتاسيوم بس ."
هل الكلام ده قاعدة ثابته ؟
لأ.
لأن البرنامج الغذائي بيتحدد حسب المحصول ومرحلة النمو وحالة النبات والتربة وباقي الظروف .
ممكن يتغير الإحتياج النسبي للعناصر خلال المراحل , لكن ده مش معناه إن عنصرا واحدا يلغي كل العناصر الأخرى .
الخلاصة :
1- البوتاسيوم مش لتحجيم الثمار فقط .
2- البوتاسيوم له دور مهم في تنظيم المياه والثغور والعمليات الحيوية داخل النبات .
3- له علاقة بنقل المركبات وجودة المحصول في محاصيل كثيرة .
4- نقصه ممكن يظهر في صورة أعراض علي حواف الأوراق وضعف في النمو أو الجودة , لكن لازم نشخص قبل ما نحكم .
5- زيادة البوتاسيوم ممكن تسبب اختلالا في توازن العناصر .
6- جودة الثمار مش مسؤلية عنصر واحد .