الدرس الرابع : حركة النيتروجين وتشخيص أعراض النقص

حركة النيتروجين وتشخيص أعراض النقص

بعد ما عرفنا وظيفة النيتروجين , فيه معلومتين مهمين جدا لازم أي مهندس يعرفهم :

النيتروجين بيتحرك جوه النبات ازاي ؟

و :

لو النبات ناقص نيتروجين , الأعراض هتظهر فين ؟

أولا : النيتروجين عنصر متحرك

النيتروجين من العناصر المتحركة داخل النبات .

يعني إيه متحرك ؟

يعني لما النبات يكون متحتاج نيتروجين , يقدر يعيد توزيع جزء من النيتروجين الموجود في الأنسجة القديمة وينقله للأجزاء اللي لسه بتنمو .

تخيلها كده :

عندك نبات عنده ورق قديم وورق جديد .

لو النبات بدأ يعاني من نقص النيتروجين , ممكن النبات " يوفر " احتياجات النموات الجديدة علي حساب الأوراق القديمة .

فتبدأ علامات النقص تظهر علي الأوراق القديمة أولا .

 

ثانيا : أعراض نقص النيتروجين تظهر فين ؟

بما إن النيتروجين متحرك :

أعراض نقصه غالبا تبدأ في الأوراق القديمة والسفلية .

ومن أشهر العلامات :

-         اصفرار الأوراق القديمة .

-         ضعف النمو العام .

-         قلة النمو الخضري .

-         صغر حجم الأوراق في بعض الحالات .

-         النبات يبدو ضعيفا أو شاحب اللون .

لكن لازم ناخد بالنا من كلمة  "غالبا "

لاننا مش بنشخص نقص النيتروجين من لون الورقة فقط .

 

ليه الأوراق القديمة بتصفر الأول ؟

دي أهم نقطة لازم نفهمها , مش نحفظها .

النبات عنده نقص .

فهو بيحاول يحافظ على النموات الجديده لأنها مهمه لاستمرار النمو .

فيبدا ينقل جزء من النيتروجين من الأوراق القديمة إلي الأجزاء الأحدث , فتفقد الأوراق القديمة جزءا من محتواها من النيتروجين , وتبدا تظهر عليها أعراض النقص .

يعني ببساطة :

العنصر متحرك ... النبات بيعيد توزيعه ... الأعراض تظهر غالبا علي ألأوراق القديمة .

 

لكن خلي بالك ...

لو شفت ورقة قديمة صفراء , ما تقولش فورا :

" نقص نيتروجين "

لأن الورقة القديمة ممكن تصفر لأسباب كثيرة .

ممكن يكون :

-         نقص عنصر أخر

-         مشكلة في الجذور .

-         زيادة مياه .

-         ملوحة .

-         مرض .

-         شيخوخة طبيعية للأوراق .

-         أو مشكلة أخري في امتصاص العناصر .

عشان كده :

مكان ظهور العرض بيساعدنا ... لكنه مش كفاية لوحده للتشخيص .

 

مفتاح التشخيص – النيتروجين

حركة العنصر :

متحرك داخل النبات .

أعراض النقص تظهر غالبا في :

الأوراق القديمة والسفلية أولا .

أشهر علامة :

اصفرار عام للأوراق القديمة مع ضعف النمو .

سؤال مهم للمهندس :

لو المزارع قالك :

" النبات اصفر ."

اسأله :

" الاصفرار بدأ في الورق القديم ولا الورق الجديد ؟"

لأن الإجابة ممكن تغير اتجاه التشخيص بالكامل .

 

مثال عملي

مزارع عنده زرع , الورق السفلي بدأ يصفر تدريجيا , والنموات الجديده لسه خضره لكن النبات بشكل عام نموه ضعيف .

هنا نقص النيتروجين ممكن يكون أحد الاحتمالات .

لكن المهندس مايوقفش عند كده .

يبص على :

-         عمر النبات .

-         انتظام الري .

-         حالة الجذور .

-         نوع التربة .
أخر تسميد.

-         كمية التسميد .

-         شكل الأوراق الجديدة .

-         وجود أي أعراض أخرى .

وبعد تجميع المعلومات يبدأ يحدد السبب الأقرب .

 

قاعدة أكاديمية كتراج

من النهارده عايزين كل مهندس يتعود علي السؤال ده :

العنصر متحرك ولا غير متحرك ؟

وبعدها :

هل فيه سبب تاني ممكن يعمل نفس العرض ؟

لو اتعودت تفكر بالطريقة دي , انت مش بتحفظ أعراض نقص العناصر ...

أنت بدات تتعلم تشخص النبات .

 

خلاصة النيتروجين

النيتروجين : متحرك .

النقص : يظهر غالبا علي الأوراق القديمة أولا .

السبب : النبات يستطيع إعادة توزيع جزء من النيتروجين من الأنسجة القديمة إلي الأجزاء الأحدث .

أشهر الأعراض :اصفرار الأوراق القديمة + ضعف النمو .

لكن : العرض وحده لا يكفي للحكم .

افهم حركة حركة العنصر ... هتفهم مكان ظهور النقص .

أكاديمية كتراج ... نفهم الأول , وبعدين نوصي .