الدرس السادس : حركة الفوسفور وتشخيص أعراض النقص
حركة الفوسفور وتشخيص أعراض النقص
بعد ما عرفنا إن الفوسفور عنصر مهم للطاقة ونمو الجذور وتطور النبات , هنحتاج نعرف حاجة مهمة جدا :
الفوسفور بيتحرك جوه النبات إزاي ؟
و :
لو النبات ناقص فوسفور , الأعراض هتظهر فين ؟
أولا : الفوسفور عنصر متحرك
الفوسفور يعتبر من العناصر المتحركة داخل النبات .
يعني النبات يقدر يعيد توزيع جزء من الفوسفور الموجود في الأنسجة القديمة وينقله إلي الأجزاء اللي احتياجتها أعلى , خصوصا الأجزاء النامية .
وعشان كده مكان ظهور أعراض النقص مهم جدا في التشخيص .
ثانيا : أعراض نقص الفوسفور تظهر فين ؟
بما إن الفوسفور متحرك :
أعراض نقصه غالبا تبدأ في الأوراق الأقدم , أو تظهر بشكل أوضح عليها .
وممكن نشوف :
- بطء أو ضعف في النمو .
- ضعف في نمو الجذور .
- تأخر في بعض مراحل النمو والتطور .
- تغيرات في لون الأوراق , وقد يظهر لون أخضر داكن أو أرجواني/ محمر في بعض النباتات وتحت ظروف معينة .
لكن لازم نقف هنا .
مش كل ورقة لونها أورجواني معناها نقص فوسفور .
طيب ليه ممكن الورقة تتحول لأرجواني ؟
دي نقطه مهمة جدا .
بعض النباتات عند تعرضها لنقص الفوسفور ممكن تزيد فيها مركبات مرتبطة باللون الأرجواني أو المحمر , فتظهر هذه الألوان على الأوراق أو السيقان .
لكن اللون ممكن يظهر أيضا بسبب عوامل اخرى , ومن أشهرها :
انخفاض درجات الحرارة .
وكمان ممكن يكون مرتبط بإجهاد أو عوامل أخرى حسب المحصول .
يعني :
اللون الأرجواني علامة تساعدنا في التشخيص , لكنه مش حكم نهائي .
ليه الأعراض تظهر علي الأوراق القديمة ؟
لأن الفوسفور عنصر متحرك .
لما النبات يكون عنده نقص , يقدر يعيد توزيع جزء من الفوسفور الموجود في الأنسجة الأقدم ويوجهه للأجزاء النامية .
فتبدأ الأنسجة القديمة تتأثر أولا أو تكون الأعراض فيها أوضح .
يعني القاعدة ببساطة :
الفوسفور متحرك ... النبات يعيد توزيعه ... الأعراض غالبا تظهر في الأوراق القديمة .
مفتاح التشخيص – الفوسفور
حركة العنصر :
متحرك داخل النبات .
أعراض النقص تظهر غالبا في :
الأوراق القديمة أو الأجزاء الأقدم من النبات .
أشهر العلامات المحتملة :
- بطء النمو .
- ضعف نمو الجذور .
- تأخر في النمو والتطور .
- أوراق خضراء داكنة في بعض الحالات .
- ظهور لون أورجواني أو محمر في بعض النباتات والظروف .
سؤال مهم للمهندس :
لو المزارع قالك :
" النبات لونه غريب ومش بيكبر ."
ما تقولش فورا :
" ده نقص فوسفور ."
اسأله :
اللون ظهر في الأوراق القديمة ولا الجديدة ؟
والجو كان عامل ازاي ؟
النبات نموه عامل ازاي ؟
الجذور حالتها إيه ؟
لأن التشخيص مجموعة علامات , مش علامة واحدة .
مثال عملي
مزارع عنده محصول والنباتات نموها بطئ , والأوراق القديمة شكلها مختلف , وبعض النباتات ظهر عليها لون أرجواني .
هل ده ممكن يكون نقص فوسفور ؟
آه ممكن .
لكن قبل التوصية لازم نراجع :
- عمر النبات .
- درجة الحرارة .
- نوع التربة .
- درجة الحموضه PH لو متاحة .
- حالة الجذور .
- نظام الري .
- برنامج التسميد .
- وهل الفوسفور موجود أصلا في التربة لكن غير متاح للنبات ؟
لأن وجود الفوسفور في التربة لا يعني بالضرورة أن النبات قادر على الاستفادة منه .
نقطة مهمة جدا
الفوسفور متحرك داخل النبات , لكن ده شئ مختلف عن حركته داخل التربة.
ودي نقطه لازم نفرق بينها .
داخل النبات : متحرك .
في التربة : حركته محدودة نسبيا .
يعني ممكن يكون النبات قادر يعيد توزيع الفوسفور داخله , وفي نفس الوقت الفوسفور الموجود في التربة لا يتحرك بسهولة إلي مسافات بعيدة عن مكان وجوده .
وده أحد الأسباب اللي بتخلي طريقة وضع الفوسفور وإدارة منطقة الجذور مهمة .
قاعدة أكاديمية كتراج
كل ما تشوف عرض نقص , اسأل نفسك 3 أسئلة :
1- العنصر متحرك ولا غير متحرك داخل النبات ؟
2- الأعراض ظهرت علي الأوراق القديمة ولا الجديدة ؟
3- هل فيه ظروف أخرى ممكن تعمل نفس العرض ؟
لو عملت التلاته دول قبل ما توصي ...
أنت بدات تتحول من شخص بيعرف أسماء الاسمدة إلي شخص بيفهم تغذية النبات .
خلاصة الفوسفور
الفوسفور ك متحرك داخل النبات .
النقص : يظهر غالبا في الاوراق القديمة أو الأجزاء الأقدم .
الأعراض المحتملة : ضعف النمو , ضعف الجذور , تأخر التطور , وتغيرات لونية قد تشمل الأرجواني أو الأحمر في بعض المحاصيل والظروف .
لكن : انخفاض الحرارة وعوامل أخرى ممكن تعمل أعراض مشابهة .
مكان ظهور العرض مهم ... لكن لازم تقرأ النبات كله قبل ما تحكم .
أكاديمية كتراج ... نفهم الأول , وبعدين نوصي .